Bodi ya Tanesco yakalia kuti kavu

Mkurugenzi Mkuu wa Tanesco, Mhandisi William Mhando

Takribani miezi miwili na ushei tangu Bodi ya Shirika la Umeme nchini (Tanesco) kuwasimamisha kazi viongozi wakuu wa shirika hilo akiwamo Mkurugenzi Mkuu, William Mhando na wenzake watatu kwa tuhuma za ubadhirifu na matumizi mabaya ya madaraka, wizara mama ya shirika hilo, imetangaza kuwa itaivunja bodi hiyo ili kuisuka upya kwa kuingiza watu wenye upeo na uzalendo.

Tamko kwamba bodi hiyo sasa imekalia kuti kavu lilitolewa jana na Naibu Waziri wa Nishati na Madini, Stephen Masele, alipokuwa akizindua kitabu chenye taarifa kuhusu Haki za Binadamu na Biashara/Uwekezaji nchini kilichoandaliwa na Kituo cha Sheria na Haki za Binadamu (LHRC).

Julai 14, mwaka huu bodi ya Tanesco chini ya Mwenyekiti wake, Janerali Mstaafu, Robert Mboma, iliwasimamisha kazi Mhando; Naibu Mkurugenzi Mtendaji Huduma za Shirika, Robert Shemhilu, Ofisa Mkuu wa Fedha Lusekelo Kassanga na Meneja Mwandamizi, Manunuzi Harun Mattambo.

Vigogo hao walisimamishwa ili kupisha uchunguzi dhidi ya tuhuma zinazowakabili.
Masele alisema wizara iko mbioni kuzivunja na kuziunda upya bodi za Shirika la Madini la Taifa (Stamico) na ya Tanesco ili ziwe na watu wenye sifa na uzalendo wa kusimamia maslahi ya nchi kama ilivyofanyika kwenye Shirika la Maendeleo ya Petroli Tanzania (TPDC).

Masele ambaye anashughulikia Madini, alisema kwamba wizara yake inakusudia kuchukua hatua hiyo kama mojawapo ya mapinduzi makubwa iliyodhamiria kuyafanya kutokana na mchango mkubwa inayoweza kuutoa katika uchumi wa nchi kutokana na kusimamia sekta muhimu kwa maendeleo ya nchi za madini, nishati na kwa hivi sasa gesi na mafuta.

“Stamico kwa sasa inatakiwa ibebe uchumi wa nchi, kwa kusimamia hisa za serikali kwenye uwekezaji wa madini, na kwa hali hiyo tunahitaji kupata watu walio na sifa stahiki na waliopatikana bila ya upendeleo na kujuana, bali kutoka kwenye ushindani wa wazi,” alisema.

Alisema shirika hilo pamoja na mengineyo, lina kazi za kusimamia asilimia 50 ya hisa toka kwenye kampuni ya Tanzanite One na asilimia 15, 20 hadi 30 ya hisa za serikali zinazotarajiwa kwenye makampuni mengine na kwa hali hiyo inabidi liwe na watu wenye uwezo na wanaoongozwa na uzalendo.

Masele alisema kuwa wizara yake imedhamiria kwa dhati kulinda maslahi ya Watanzania ili itoe mchango utakaowezesha kujenga ustawi wa wananchi na kutokana na hali hiyo, alisema kwamba wako tayari ‘kuchinja’ watu wachache watakaojaribu kuwazuia kulifikia lengo hilo kwa maslahi ya wengi na kwamba wamegundua kuwa ‘wanaoiua’ nchi ni Watanzania wenyewe.

“Wakati wanaandikisha maelezo yao wale wawekezaji tuliowakamata hivi karibuni kwa kosa la kutolipa kodi inayotakiwa, walieleza kuwa mara nyingi maofisa wa Kitanzania waliowekwa kwa ajili ya kuona na kuchukua takwimu za madini yanayofungwa kwa ajili ya kusafirishwa nje waliwaruhusu wawekezaji hao kufunga madini bila ya wao kuwapo kwa maelezo kuwa watazisaini nyaraka za mizigo hiyo kesho yake,” alisema.

Akiizungumzia Tanesco, Masele alisema kwamba wanakusudia kuivunja bodi ya shirika hilo kutokana na dhamira yao ya kuhakikisha kwamba mgawo wa umeme hautokei tena na kwamba kukamilika kwa bomba la gesi hapo Machi mwakani na kuanza kutumika kwa gesi hiyo viwandani na majumbani kunahitaji bodi imara, yenye weledi na uzalendo kwa nchi.

Alisema wizara yake imeunda kikosi kazi kinachoundwa na wastaafu wa shirika hilo wakiongozwa na Mkurugenzi Mkuu mstaafu wa Tanesco, Baruany Luhanga, kwa lengo la kuupitia muundo wa shirika hilo na kupendekeza muundo stahiki unaofaa kufuatwa na shirika na kwamba kikosi kazi hicho kimewezeshwa kwenda nje ya nchi kwa lengo la kujifunza mfumo unaofaa.

“Kuna maelezo yanayotolewa kwamba shirika limewekeza rasilimali na utaalamu zaidi kwenye uzalishaji wa umeme, badala ya usafirishaji na usambazaji, hali inayoweza ikasababisha umeme mwingi ukazalishwa zaidi ya uwezo wa kuusafirisha au zaidi ya uwezo wa kuusambaza na mapendekezo yanatolewa kwamba pengine ni vizuri kila eneo likajitegemea,” alisema Naibu Waziri huyo.

Alisema wizara inakusudia kuwa na bodi itakayolenga kuhakikisha kwamba bei ya nishati hiyo inashuka na hivyo kushusha gharama za uzalishaji viwandani na hatimaye kupunguza makali ya maisha kwa wananchi.

Aidha, mbali na kuvunja bodi hizo, Masele alisema kwamba wanakusudia kuziongezea nguvu za wataalamu na rasilimali menejimenti za mashirika hayo ili ziende na kasi wanayoihitaji ya kulinda rasilimali za nchi kwa faida ya Watanzania.

Kwa upande wake, Mkurugenzi Mtendaji wa LHRC, Dk. Helen Kijo- Bisimba, aliipongeza kazi nzuri inayoendelea kufanywa na wizara hiyo chini ya Waziri wake, Profesa Sospeter Muhongo, baada ya kuteuliwa kuiongoza.

“Tunaipongeza wizara kwa kukataa nchi yetu kuendelea kuwa shamba la bibi, kwamba kila mtu anakuja kuchuma na kuondoka zake,” alisema Dk. Bisimba na kuongeza:

“Tunawaunga mkono katika dhamira yenu ya kuwatupa nje wale wachache wasiolinda maslahi yetu na sisi tutaungana na nyie kuwacheka na kuwang’ong’a mtakapowatupa kupitia madirishani.”

Taarifa iliyozinduliwa jana ni ya kwanza kutolewa na LHRC katika historia ya utetezi wa haki za binadamu nchini na imetazama sheria na sera mbalimbali katika biashara/uwekezaji, mkazo ukiwa kwenye maeneo matano.

Maeneo hayo ni haki za ajira na kazi, haki ya kumiliki ardhi, haki ya kuishi katika mazingira safi na salama, haki za walaji na bidhaa zinazozalishwa viwandani pamoja na uwajibikaji wa kampuni kwa jamii.

Pato la Taifa lakua kwa asilimia 6.9

Pato la Taifa kwa robo mwaka ya pili ya mwaka huu limekua kwa kwa asilimia 6.9, ikilinganishwa na asilimia 7.0 mwaka jana, ambapo thamani halisi ya pato hilo ni Sh. 4,730709, ikilinganishwa na Sh. 4,426,905 mwaka jana.

Ripoti hiyo ilitolewa na Mkurugenzi wa Takwimu za Uchumi wa Ofisi ya Taifa ya Takwimu, Maurice Oyuke, jana jijini Dar es Salaam, alipokuwa akizungumza na waandishi wa habari kuhusu ripoti ya pato la Taifa kwa robo ya pili ya mwezi Aprili na Juni, 2012.

Oyuke alisema kuwa pato katika kilimo limekua kwa asilimia 5.2 ikilinganishwa na asilimia 5.9 kwa robo pili ya mwaka jana na kwamba ongezeko hilo limetokana na mvua za kutosha pia na juhudi za serikali katika uboreshaji wa masuala ya kilimo.

Aliongeza shughuli za madini limekua kwa asilimia 1.0 ikilinganishwa kwa asilimia 5.6 mwaka jana kutokana na kupungua kwa kasi ya ukuaji  baada ya ikufungwa kwa muda mgodi wa dhahabu wa Geita ili kupisha ukarabati wa mitambo.

Kwa upande wa uvuvi, alisema pato limekua kwa asilimia 4.0 kutoka asilimia 0.3 ya mwaka jana kutokana na ongezeko la uvunmaji wa samaki kwa ajili ya soko la ndani na nje.

Kwa upande wa viwanda, alisema pato limekua kwa asilimia 8.2 ikilindanishwa kwa asilimia 8.5 mwaka jana. Alisema kiwango hicho kimefikiwa kutokana na upatikanaji wa umeme.

Kuhusu umeme, gesi na maji, Oyuke alisema pato limekua kwa asilimia 5.6 ikilinganishwa kwa asilimia 10.3 ya mwaka jana kutokana na kupungua uzalishaji wa umeme katika kipindi hicho.

Katika sekta za chukuzi na mawasiliano, alisema patolimekua kwa asilimia 5.2 ikilinganishwa na asilimia 16.6 mwaka jana na kwamba hali hiyo imetokana na matumizi ya simu, usafilishaji wa abaria na mazigo. Pato la huduma ya fedha limekua kwa asilimia 14.1 ikilinganishwa kwa asilimia 10.0 mwaka jana kutokana na kuongezeka kwa amana na mikopo.

Polisi waua tena

Kaimu Kamanda wa Polisi mkoa wa Geita, Paulo Kasabago

Jeshi la Polisi limeendelea kuandamwa na matukio ya kuua raia baada ya askari wake wanne, akiwamo Mkuu wa Kituo (OCS) kukamatwa kwa tuhuma za kuvamia nyumba ya kulala wageni, kujeruhi, kupora mali na kumuua mchimbaji wa madini.

Tukio hilo limetokea katika Wilaya ya Chato, mkoani Geita baada ya askari hao kutuhumiwa kuwavamia wafanyabiashara wawili waliokuwa kwenye nyumba hiyo, kuwapora fedha, mawe yanayosadikiwa kuwa dhahabu na kuwajeruhi kwa vipigo ambavyo vilisababisha kifo cha mmoja wao.

Askari wanaotuhumiwa kuhusika katika tukio hilo ni wa kituo cha polisi cha Buziku wilayani Chato ambao waliwavamia David Gilles Vyamana na Gilbert Ntabonwa, wakazi wa kijiji cha Kakeneno wilayani humo na wazaliwa wa Wilaya ya Kibondo mkoani Kigoma.

Tukio hilo lilitokea usiku wa Agosti 30, mwaka huu wakati watu hao wakiwa kwenye nyumba ya wageni ya Buziku Inn.

Watu hao wanaosadikiwa kuwa ni wachimbaji wadogo wa dhahabu, kabla ya kukumbwa na mkasa huo, walitokea kijijini kwao Kakeneno na kuelekea kijiji cha Buziku kwa ajili ya kuburudika na kwamba baada ya kupanga vyumba katika nyumba hiyo mmoja akiwa chumba namba mbili na mwingine namba tatu, walimuomba mhudumu kuendelea kuwahudumia vinywaji wakiwa vyumbani.

Habari zinasema kuwa saa 5:30 usiku, polisi walivamia eneo hilo na kuwaamuru wachimbaji hao kufungua milango ya vyumba vyao.

Kwa mujibu wa chanzo chetu, baada ya watu hao kukataa kutii amri hiyo huku wakihoji uhalali wa kuwaamuru kufungua milango wakati wamelala, askari hao walitumia nguvu kubwa na kufanikiwa kuvunja milango kisha kuanza kuwaadhibu kwa vipigo vikali.

Habari zinadai kuwa katika chumba cha kwanza askari hao walichukua kiasi cha Sh. 500,000 na  mawe yanayosadikiwa kuwa ni dhahabu yaliyokuwa yamehifadhiwa kwenye mfuko mdogo katika chumba cha pili.

Baada ya kuwapa kichapo, waliwachukua na kuwapeleka kwenye kituo cha polisi na kushikiliwa kwa muda na baadaye baada ya kubaini kuwa hali zao zinaendelea kuwa mbaya kutokana na majeraha, walilazimika kuwaondoa haraka na kuwapeleka kwenye Kituo cha Afya cha Bwanga kabla ya kuwahamishia  Hospitali ya Wilaya ya Chato kwa  matibabu zaidi.

Shuhuda mwingine, alidai kuwa baada ya wachimbaji hao kukaidi kufungua milango licha ya mhudumu wa nyumba hiyo, Godesiliva Paulo, kuwataarifu kuwa wanaowahitaji ni askari polisi, polisi walilazimika kutumia nguvu kuingia ndani, lakini katika hali ya kushangaza wachimbaji hao walikutwa ndani ya chumba kimoja wakiendelea kunywa pombe na ghafla mmoja wao alimkwida koo PC Mwidin, hali iliyowalazimu kutumia nguvu kubwa kuwaondoa vyumbani vyao kwa lengo la kuwapeleka kituo cha polisi.

Aliongeza kuwa baada ya askari hao kufanikiwa kuwatoa ndani ya chumba wachimbaji hao walikaidi kwenda kituo cha polisi na kuanza kupiga yowe wakiomba msaada kwa wananchi na baada ya muda mfupi, watu wengi walikusanyika eneo hilo na kuanza kuwashambulia na kuwajeruhi.

Alisema kuwa baada ya kutambua hali zao siyo nzuri walilazimika kuwapeleka kupata matibabu, lakini wakati wakiendela kuhudumiwa, mmoja wao aliyefahamika kwa jina la Gilbert Ntabonwa (40) alifariki dunia akiwa kwenye Hospitali ya Wilaya ya Chato.

KAULI YA KAIMU RPC

Akizungumza na NIPASHE, Kaimu Kamanda wa Polisi mkoa wa Geita, Paulo Kasabago, mbali na kuthibitisha kuwapo kwa tukio hilo, alisema kuwa uchunguzi wa Jeshi la Polisi umebaini kuwa askari wake walienda kwenye nyumba hiyo ya kulala wageni baada ya kupata taarifa kutoka kwa raia wema kuhusiana na kuwepo kwa watu wanaohofiwa kuwa ni wahalifu kutokana na mazungumzo yao wakati wakinywa pombe kabla ya kuingia ndani ya vyumba vyao.

“Askari wetu walikwenda eneo hilo baada ya kupigiwa simu na raia mwema kuwa watu waliokuwa wakinywa pombe kwenye gesti hiyo siyo wema kutokana na mazungumzo mbalimbali waliyokuwa wakiyazungumza kabla ya kuhama nje na kuingia ndani ya vyumba vyao,” alisema Kasabago.

 Kufuatia hali hiyo jeshi hilo linawashikilia askari wake wanne akiwemo mkuu wa kituo hicho, Sajenti Raulens Bendera, kwa ajili ya uchunguzi wa kina kuhusiana na tukio hilo la mauaji na kwamba itakapothibitika kuhusika, hatua za kisheria zitashika mkondo wake.

 ASKARI WANAOSHIKILIWA

Kamanda Kasabago aliowataja wengine wanaoshikiliwa kuwa ni PC Mwidini, PC abdallah na PC Yusuph, wote wakiwa ni askari wa kituo kidogo cha Buziku wilayani Chato.

Kamanda Kasabago aliongeza kuwa baada ya upekuzi uliofanywa na askari hao, waliwakuta wachimbaji hao wakiwa na fedha taslimu Sh. 500,500, kiroba cha mfuko unaosadikiwa kuwa na mawe ya dhahabu na chupa moja ya bia.

Mganga Mkuu wa Hospitali ya Wilaya ya Chato, Dk. Pius Buchukundi, alithibitisha kupokea majeruhi wawili waliopelekwa hospitalini hapo kutoka Kituo cha Afya cha Bwanga na kwamba wakati wakiendelea kuwatibu, mmoja wao alifariki dunia na kwamba Vyamana anaendelea vizuri.

Dk. Buchukundi alisema kuwa uchunguzi wao ulibaini kuwa marehemu alijeruhiwa kutokana na kipigo kilichosababisha damu kuvujia ndani ya mwili.

Kwa mujibu wa Dk. Buchukundi, tayari ndugu na jamaa wa marehemu huyo wamefika na kuchukua mwili wake kwa ajili ya kuusafirisha kwenda nyumbani kwao Kibondo, mkoani Kigoma kwa ya maziko.

Septemba 2, mwaka huu, polisi walimuua aliyekuwa mwandishi wa habari wa kituo cha televisheni cha Channel Ten, mkoani Iringa, Daudi Mwangosi, katika kijiji cha Nyololo, wilayani Mufindi, Mkoa wa Iringa wakati viongozi wa Chama cha Demokrasia na Maendeleo (Chadema) wakifungua tawi la chama chao.

Askari mmoja, Pacificus Cleophace Simon (23), alifikishwa mahakamni mjini Iringa akikabiliwa na kosa la kumua Mwangosi.

Jumapili iliyopita Rais Jakaya Kikwete katika hotuba yake ya mwisho wa mwezi wa Septemba pamoja na mambo mengine aliwataka polisi kuacha kutumia nguvu kupita kiasi wanapokabilina na vikundi na raia.

Vigogo CCM ‘wahamia’ Marekani •  Ni JK, Mkapa, Kinana, Membe na Nape VIGOGO watano wa Chama cha Mapinduzi (CCM), wako nchini Marekani, Tanzania Daima Jumatano limebaini.

Uwepo wa vigogo hao Marekani kwa wakati mmoja, umeibua gumzo nchini hususan kwa mitandao ya makada wa chama hicho wanaotajwa kutaka kuwania urais mwaka 2015. Vigogo hao ni pamoja na Rais Jakaya Kikwete, Rais mstaafu, Benjamin Mkapa, na mjumbe wa Kamati Kuu (CC) na Halmashauri Kuu (NEC), Abdulhaman Kinana, ambaye amepata kuwa kampeni meneja wa marais hao wawili. Mwingine ni Waziri wa Mambo ya Nje na Ushirikiano wa Kimataifa, Bernad Membe, ambaye amekuwa akitajwa kuwa mmoja wa makada watakaowania urais mwaka 2015. Wakati vigogo hao wako nchini Marekani, kigogo mwingine wa CCM, Nape Nnauye, ambaye ni Katibu wa Itikadi na Uenezi, Nape Nnauye, anatarajia kwenda nchini Marekani kesho. Ingawa vigogo hao wako Marekani kwa shughuli na sababu tofauti, mahasimu wa Waziri Membe kisiasa wamehusisha ziara hiyo ya wazito hao na harakati za urais 2015. Rais Kikwete yuko nchini Marekani kwa ziara ya kikazi. Rais na ujumbe wake uliondoka nchini juzi na atakuwa hapo kwa siku mbili kabla ya kuelekea nchini Canada kwa ziara nyingine rasmi ya kiserikali. Habari zinasema kuwa Mkapa na Kinana waliondoka nchini wakati vikao vya mchujo vya CCM vikiendelea mjini Dodoma na wako nchini humo kwa ajili ya shughuli za taasisi ya Mkapa Foundation na Nape anatarajia kwenda kwa shughuli zake binafsi. Hadi sasa hakuna kada yeyote wa CCM aliyetangaza kuwania urais, lakini mbali ya Membe, duru za kisiasa zinawataja makada wengine wanaotaka urais kuwa ni pamoja na mawaziri wakuu wastaafu, Frederick Sumaye na Edward Lowassa. Hata hivyo, kasi ya Sumaye kuwania nafasi hiyo imepunguzwa na matokeo ya uchaguzi wa NEC, wilayani Hanang’ ambapo aliangushwa na Dk. Mary Nagu. Wengine ni Samuel Sitta, Dk. Abdallah Kigoda, Dk. Emmanuel Nchimbi, Dk. Asha Rose Migiro na wengine.

Ujenzi wa barabara ya morogoro road ukiendelea kwa kasi kubwa, na kampuni ya kijerumani STRABAG kamainavyo onekana hapo kwenye picha ni daraja la kimara mwisho likiwa kwenye hatua za ujenzi na wakandarasi wa kijerumani wa kampuni ya strabag wakifanya ujenzi kwa umakini wa hali ya juu,

Watani wa jadi wameshindwa kutambiana baada ya kutoka kwa sare ya 1-1 katika pambano la kusisimua uwanja wa Taifa. Simba walikuwa wa kwanza kuzifumania nyavu kwa bao la Amri Kiemba alieunganisha kazi nzuri ya Mwinyi Kazimoto wakati Yanga walisawazisha kipindi cha pili kwa mkwaju wa Penati uliofungwa kifundi na Said Bahanuzi baada ya beki Paul Ngalema kuunawa mpira kwenye eneo la hatari. Yanga walilazimika kucheza robo ya mwisho wakiwa pungufu baada ya Simon Msuva kupewa kadi nyekundu kwa kumchezea ndivyo sivyo Juma Nyoso. Hadi kipenga cha mwisho kinapulizwa Yanga 1-1 Simba.

Kocha wa Simba Milovan Cirkovick akiongea na mtangazaji wa kituo cha Supersport Jokate Mwegelo baada ya mchezo ambapo alisema Simba ilicheza vizuri huku akiwapongeza wachezaji wake na kuisifia pia Yanga kuwa ilijitahidi na imeimarika tofauti na mchezo wa mara ya mwisho